खुलताबाद, २८ जुन २०२६ : राष्ट्रीय पल्स पोलिओ लसीकरण मोहिमेअंतर्गत खुलताबाद शहरातील जुना बसस्थानक परिसरात रविवारी उत्साहपूर्ण वातावरणात मोहिमेचा शुभारंभ करण्यात आला. शहरातील पाच वर्षांखालील बालकांना पोलिओची प्रतिबंधक लस देत आरोग्य विभागाने लसीकरण मोहिमेला प्रारंभ केला.
या मोहिमेचा शुभारंभ माजी नगराध्यक्ष तथा नगरसेवक ॲड. एस. एम. कमर यांच्या हस्ते बालकांना पोलिओचे दोन थेंब पाजून करण्यात आला. यावेळी आरोग्य विभागाच्या कर्मचाऱ्यांनी पालकांना पोलिओ लसीकरणाचे महत्त्व पटवून देत पाच वर्षांखालील प्रत्येक बालकाला पोलिओचा डोस देण्याचे आवाहन केले.
कार्यक्रमास माजी नगरसेवक सय्यद मकसूद अली कादरी, शेख हमीदोद्दीन, अशरफ खान, मुश्ताक अहमद, हाजी सिद्दीक अहमद, शेख रियाज, हबीब अहमद टेलर, सय्यद जाफर, अधिपरिचारिका रोहिणी पोहनेकर, लॅब टेक्निशियन क्षितिज वाघमारे, कक्ष सेवक मोरे तसेच आरोग्य विभागातील कर्मचारी उपस्थित होते.
पोलिओसारख्या गंभीर आजारापासून बालकांचे संरक्षण करण्यासाठी शासनाच्या वतीने राबविण्यात येणाऱ्या या मोहिमेला पालकांनी उत्स्फूर्त प्रतिसाद द्यावा आणि आपल्या पाच वर्षांखालील सर्व बालकांचे लसीकरण करून घ्यावे, असे आवाहन माजी नगराध्यक्ष तथा नगरसेवक ॲड. एस. एम. कमर यांनी यावेळी केले.
Comments