खुलताबाद प्रतिनिधी: सलमान फय्याज खान
वाहतुकीचे नियम पायदळी तुडवणाऱ्या आणि रस्त्यावर बेफिकीरपणे गाड्या पळवणाऱ्या वाहनधारकांना खुलताबाद पोलिसांनी सोमवारी चांगलाच दणका दिला आहे. खुलताबाद पोलीस आणि वाहतूक शाखेने संयुक्तपणे राबवलेल्या एका धडक मोहिमेत अवघ्या ३ तासांत तब्बल ८५ वाहनांवर दंडात्मक कारवाई करण्यात आली असून, १ लाख ४० हजार ७५० रुपयांचा मोठा दंड वसूल करण्यात आला आहे.
वेरूळ टी-पॉइंट येथील संजरी हॉटेलसमोर ही विशेष नाकाबंदी मोहीम राबवण्यात आली होती. पोलिसांच्या या अचानक झालेल्या कारवाईमुळे नियम मोडणाऱ्या वाहनचालकांचे धाबे दणाणले आहेत.
३ तासांत १८० वाहनांची कसून तपासणी
पर्यटन आणि वाहतुकीच्या दृष्टीने अत्यंत महत्त्वाच्या असलेल्या खुलताबाद-वेरूळ रोडवर सोमवारी पोलिसांनी अचानक नाकाबंदी सुरू केली. अवघ्या तीन तासांच्या या मोहिमेदरम्यान पोलिसांनी संशयास्पद आणि नियम मोडणाऱ्या तब्बल १८० वाहनांची कसून तपासणी केली. लायसन्स नसणे, ट्रिपल सीट, हेल्मेट-सीटबेल्टचा वापर न करणे, फॅन्सी नंबर प्लेट आणि कागदपत्रांची पूर्तता नसलेल्या ८५ वाहनधारकांना जागेवरच पकडून त्यांच्यावर दंडात्मक कारवाईची कुऱ्हाड चालवण्यात आली.
'हे' अधिकारी होते ॲक्शन मोडमध्ये!
वरिष्ठ अधिकाऱ्यांच्या मार्गदर्शनाखाली ही संपूर्ण मोहीम अत्यंत नियोजनबद्ध पद्धतीने पार पडली. या धडक कारवाईचे थेट नेतृत्व पोलीस निरीक्षक प्रशांत महाजन आणि सहायक पोलीस निरीक्षक विशाल बोडखे यांनी केले. या मोहिमेत वाहतूक अंमलदार आर. ए. दांडगे, हेडकॉन्स्टेबल ए. ए. शेख यांच्यासह पोलीस स्टेशन व वाहतूक शाखेतील इतर अंमलदार आणि कर्मचाऱ्यांनी सक्रिय सहभाग नोंदवत नियमबाह्य वाहन चालवणाऱ्यांना चांगलाच शिस्तीचा धडा शिकवला.
पोलीस प्रशासनाचा इशारा:
> "वाहतुकीचे नियम हे नागरिकांच्या सुरक्षिततेसाठीच आहेत. नियमांचे उल्लंघन करून स्वतःचा आणि इतरांचा जीव धोक्यात घालणाऱ्यांवर यापुढेही अशीच कडक आणि सातत्यपूर्ण कारवाई केली जाईल."
0 Comments