मुंबईच्या वाहतूक कोंडीला समुद्री मार्गाची साथ! ‘जल मेट्रो’मुळे शहराच्या प्रवासात मोठी क्रांती?

"मुंबईच्या वाहतूक कोंडीचा शेवट अखेर सुरू होतोय का? कोचीच्या धर्तीवर ‘जल मेट्रो’ आणण्याची खासदार रविंद्र वायकर यांची धमाकेदार मागणी—अरबी समुद्रातून धावणार मुंबईची नवी मेट्रो!"

वृत्तांकन: संदिप कसालकर (संपादक)

मुंबई—रस्ते तुडुंब, ट्राफिक थांबलेलं, आणि लाखो मुंबईकरांची रोजची धावपळ… या कोंदणातून बाहेर पडण्यासाठी आता एक क्रांतिकारक पर्याय पुढे आला आहे. मुंबई उत्तर पश्चिमचे खासदार रविंद्र वायकर यांनी राज्य सरकारला कोचीच्या धर्तीवर ‘जल मेट्रो प्रकल्प’ तातडीने राबवण्याची जोरदार मागणी केली आहे. जलमार्गांचा वापर करून मुंबईतील वाहतूक कोंडीला मोठा दिलासा मिळू शकतो, असं त्यांनी स्पष्टपणे नमूद केलं आहे.

ही मागणी त्यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना पाठवलेल्या निवेदनाद्वारे केली असून, मुंबईच्या ट्रान्सपोर्ट सिस्टीममध्ये हा प्रकल्प गेमचेंजर ठरू शकतो, असा त्यांचा ठाम विश्वास आहे.

मुंबईला जल मेट्रोची गरज का?

खासदार वायकर यांच्या निवेदनात स्पष्ट आकडेवारी—

• मुंबई महानगर क्षेत्राची लोकसंख्या झपाट्याने वाढताना रस्ते आणि विद्यमान पायाभूत सुविधा त्यापुढे अपुऱ्या ठरत आहेत.
• एमएमआरची लोकसंख्या २०२३ मधील २.५७ कोटींवरून २०३० पर्यंत जवळपास ३ कोटी, तर २०३७ पर्यंत ३.६ ते ३.८ कोटींपर्यंत वाढण्याची शक्यता.
• या वेगाने वाढणाऱ्या गर्दीत पारंपरिक रस्ते-वाहतूक प्रणाली पुरेशी ठरणार नाही.

यामुळे अरबी समुद्राचा नैसर्गिक जलमार्ग म्हणून उपयोग करून इलेक्ट्रिक, स्वच्छ आणि पर्यावरणपूरक जल मेट्रो हा मुंबईसाठी सर्वोत्तम पर्याय ठरू शकतो, असा त्यांचा दावा आहे.

कोचीच्या यशाचा दाखला:

एप्रिल 2023 मध्ये पंतप्रधान नरेंद्र मोदी यांच्या हस्ते कोची जल मेट्रो सुरू करण्यात आली आणि तेव्हापासून—

• ४० लाख प्रवासी जल मेट्रोने प्रवास करून गेले.
• दररोज ५,५०० ते ६,००० प्रवासी ही सेवा वापरत आहेत.

हा अनुभव मुंबईसारख्या किनारी शहरात जल-आधारित सार्वजनिक वाहतूक पूर्णपणे व्यवहार्य आणि उपयुक्त ठरू शकते, हे सिद्ध करतो.

केंद्राचा मोठा निधी – मोठी संधी

लोकसभेत दिलेल्या माहितीनुसार, केंद्र सरकारने महाराष्ट्रातील इन्फ्रास्ट्रक्चर प्रकल्पांसाठी तब्बल ₹३,८३,१४७ कोटींचा निधी उपलब्ध करून दिला आहे.

हीच वेळ आहे, मुंबईच्या जल मेट्रो प्रकल्पाला गती देण्याची, असे खासदार वायकर यांनी ठामपणे सांगितले.

जल मेट्रोसाठी तातडीने बैठकीची मागणी
जल मेट्रो प्रकल्पाचे औपचारिक नियोजन सुरू करण्यासाठी खासदार वायकर यांनी—

• तातडीने विशेष बैठक बोलावावी
• कोची जल मेट्रोच्या टीमला मुंबईत बोलवावे
• आणि या बैठकीत स्वतःलाही सहभागी करण्यात यावे

अशी मागणी केली आहे.

संभाव्य मार्ग – मुंबईची नवी जलवाहतूक रिंगलाईन:

• गेटवे ऑफ इंडिया
• नरिमन पॉईंट
• वरळी
• बांद्रा
• वर्सोवा
• बोरीवली
• मीरा भाईंदर
• वसई
• वाशी
• बेलापूर
• एनएमआयए
• कल्याण
• मुंब्रा

या सर्व किनारी ठिकाणांना जोडणारी जल मेट्रो तयार झाली तर मुंबईच्या वाहतूक नकाशात ऐतिहासिक बदल घडू शकतो.

"मुंबईच्या ट्राफिकला ‘रस्ता’ नव्हे, तर ‘मार्ग’ मिळणार समुद्रातून! जल मेट्रो अमलात आली, तर मुंबईकरांच्या प्रवासाची नवी क्रांती सुरू होईल."