खुलताबाद, १३ जुलै २०२६ : विद्यार्थ्यांनी आधुनिक तंत्रज्ञानाची कास धरून भविष्यातील आव्हानांसाठी सज्ज व्हावे, या उद्देशाने कॉमटेक - कॉम्प्युटर वेरुळ यांच्या वतीने जिल्हा परिषद शाळा पळसवाडी येथे 'AI Ready' या विशेष प्रशिक्षण कार्यक्रमाचे आयोजन करण्यात आले होते. या उपक्रमांतर्गत शाळेतील विद्यार्थ्यांना कृत्रिम बुद्धिमत्ता अर्थात 'AI' च्या अद्भुत दुनियेची सफर घडवून आणण्यात आली.
आजच्या डिजिटल युगात तंत्रज्ञानाचा वेग झपाट्याने बदलत आहे. हेच ओळखून या कार्यक्रमात विद्यार्थ्यांना AI म्हणजे काय, त्याचा दैनंदिन जीवनात आणि शिक्षणात कसा उपयोग होऊ शकतो, याबद्दल अत्यंत सोप्या आणि रंजक भाषेत मार्गदर्शन करण्यात आले. कॉमटेकच्या तज्ज्ञ मार्गदर्शकांनी विविध प्रॅक्टिकल उदाहरणे देऊन विद्यार्थ्यांना या नवीन तंत्रज्ञानाची ओळख करून दिली, ज्यामुळे विद्यार्थ्यांमध्ये विज्ञानाचा आणि तंत्रज्ञानाचा दृष्टिकोन वाढण्यास मदत होईल.
या नाविन्यपूर्ण कार्यक्रमाला कॉमटेक कॉम्प्युटरचे तज्ज्ञ शिक्षक युवराज काळे सर, अभिषेक ठेंगडे व गावकरी प्रमोद नागुर्डे प्रामुख्याने उपस्थित होते. त्यांनी विद्यार्थ्यांना 'स्मार्ट शिका, स्मार्ट काम करा' असा संदेश देत AI च्या विविध साधनांची माहिती दिली.
याप्रसंगी शाळेचे मुख्याध्यापक सुतार सर व संपूर्ण शिक्षक वृंद उपस्थित होते. मुख्याध्यापकांनी कॉमटेक कॉम्प्युटर वेरुळच्या या उपक्रमाचे विशेष कौतुक केले आणि ग्रामीण भागातील विद्यार्थ्यांना अशा प्रकारच्या जागतिक दर्जाच्या तंत्रज्ञानाची ओळख मिळणे ही काळाची गरज असल्याचे प्रतिपादन केले.
'महाराष्ट्र करूया AI Ready' या मोहिमेचा एक भाग म्हणून या मोफत कार्यशाळेचे आयोजन करण्यात आले होते. विद्यार्थ्यांमधील तंत्रज्ञानाची उत्सुकता वाढवण्यासाठी हा उपक्रम अत्यंत मोलाचा ठरला. कार्यक्रमाच्या यशस्वीतेसाठी शाळेतील शिक्षकांनी व कॉमटेकच्या समूहने विशेष परिश्रम घेतले.
Comments